थानकोट ।

चन्द्रागिरि नगरपालिकाले ‘उज्यालाे चन्द्रागिरि अभियान’ अन्तर्गत नगर क्षेत्रमा १५ हजार थान सडक बत्ति जडान गर्ने भएको छ । नगरप्रमुख घनश्याम गिरीले शुक्रबार चन्द्रागिरि  २ पिपलामोड क्षेत्रमा सडक बत्ति एवं सिसी क्यामेरा जडान एवं विस्तार कार्यको अनुगमन गर्ने क्रममा सो बताउनुभएको हो ।

त्रिभुवन राजपथ अन्तर्गत चन्द्रागिरि नगर क्षेत्रभित्र पर्ने कलंकी-नागढुङ्गा-पिपलामोड खण्डमा पहिलो चरणमा करिब ५०० थान सडक बत्ति तथा ८० वटा उच्च प्रविधिकाे सिसी  क्यामरा जडान भइसकेका छन् । नगरप्रमुख गिरीले  यसै वर्ष आवश्यकता अनुसार उक्त राजमार्ग र नगरका अधिकांश मुख्य र भित्री मार्गहरूमा पनि सडक बत्ती जडान गर्ने कार्य गरिने बताउनुभयो ।

आफ्नाे पहिलाे कार्यकालमा नगरका सबै वडाहरूलाई सडक बत्ति जडान गर्न बजेट विनियाेजन गरेको बताउनु हुँदै नगरप्रमुख गिरीले सो बखत करिब ८ हजार थान सडक बत्ति विभिन्न वडामा जडान भएकाे समेत जानकारी दिनुभयो । सो क्रममा नगरप्रमुख गिरीले उज्यालाे चन्द्रागिरि अभियान अन्तर्गत करिब १५ हजार थान सडक  बत्ति नगरका मुख्य तथा भित्री सडक, धार्मिक तथा सांस्कृतिक स्थल, पार्क लगायतका सार्वजनिक स्थलहरूमा जडान गरिने साथै  यस अभियानले निरन्तरता पाउने समेत बताउनुभयो ।