थानकोट ।

चन्द्रागिरि नगरपालिकाको प्रशासकीय भवनमा शनिबारबाटै चहलपहल बाक्लै छ । निर्वाचन अधिकृतको कार्यालय भएको यस भवनमा नगरका सबै १५ वटा वडाका मतगणना हुनेछन् । मतपरिणाम सुन्न सबै १५ वटै वडाका उम्मेदवार, उम्मेदवारका प्रतिनिधिहरू तथा मतदाताहरू शनिबार झिसमिसेबाटै नगरपालिका भवनको प्राङ्गणमा जम्मा भएका छन् । आइतबार बिहान ७ बजेसम्म चन्द्रागिरि १ र २ को अन्तिम मतपरिणाम बाहिरिसकेको छ । चन्द्रागिरि १ मा नेपाली काँग्रेसका उम्मेदवार हरिश्याम रानामगर विजयी भएका छन् । नेकपा एमालेका निवर्तमान वडाध्यक्षलाई पराजित गर्दै रानामगर वडाध्यक्षमा विजयी भएपछि नगरपालिकाको भवन अघिल्तिर नेपाली काँग्रेसका समर्थकहरूले विजय उत्सव मनाइरहेका छन् । पञ्चेबाजासहित रानामगर तथा उनको टोलीलाई समर्थकहरूले अविर तथा माला लगाइदिएको दृश्य देख्न सकिन्छ ।