थानकोट ।

आसन्न स्थानीय तह निर्वाचनका लागि मुलुकभरका निर्वाचन अधिकृतको कार्यालयमा आज पनि मनोनयनपत्र दर्ताको कार्य जारी छ । उम्मेदवारी दर्ता गर्ने आज अन्तिम दिन हो ।

बिहान १० देखि बेलुका ५ बजेसम्म योग्यता पुगेका व्यक्तिले तोकिए बमोजिमको प्रक्रिया पूरा गरी मनोनयनपत्र दर्ता गराउन सकिने निर्वाचन आयोगले जनाएको छ । सम्बन्धित निर्वाचन अधिकृतको कार्यालयमा गई मनोनयनपत्र दर्ता गराउन सकिनेछ ।

यसैबीच चन्द्रागिरि नगरपालिकास्थित निर्वाचन अधिकृतको कार्यालयमा कडा सुरक्षाबीच उम्मेदवारी दर्ता कार्य जारी रहेकाे निर्वाचन अधिकृत सिर्जना थपलियाले थानकोट टाइम्सलाई जानकारी दिनुभयो । तीन स्थानबाट मनाेनयन दर्ता भइरहेकाले के कति संख्यामा उम्मेदवारहरुले मनाेनयन दर्ता गरे साे यकिन गर्ने काम भइरहेकाे थपलियाले बताउनुभयो । उम्मेदवारहरु बाजागाजासहित मतदान अधिकृतको कार्यालयमा पुग्न खाेजेपनि सुरक्षाकर्मीले मुलद्वारबाटै बाजागाजा भित्र लैजान राेक लगाएका छन् ।  चन्द्रागिरि नगरपालिकामा वैशाख ३० मा हुने स्थानीय तहको निर्वाचन कार्यक्रमका लागि हिजो विभिन्न पदमा १३ जनाले उम्मेदवारी दर्ता गराएका थिए ।