थानकोट । 

स्थानीय तहको निर्वाचनका लागि आज देशभरका निर्वाचन अधिकृतको कार्यालयमा उम्मेदवारहरूले उम्मेदवारी दर्ता गराएका छन् । आज बिहान १० बजेदेखि साँझ ५ बजेसम्म उम्मेदवारी दर्ताको तालिका रहेको थियो यो कार्य र भोलि पनि जारी रहनेछ ।

आज मुख्यतः  स्वतन्त्र उम्मेदवारहरूले नाम दर्ता गराएका छन् यद्यपी केही दलका प्रतिनिधिले पनि उम्मेदवारी दर्ता गराएको खबर छ ।

चन्द्रागिरि नगरपालिकामा आज ५ जनाले विभिन्न पदमा उम्मेदवारको मनोनयन पत्र दर्ता गराएको निर्वाचन अधिकृतको कार्यालयले जनाएको छ । 

निर्वाचन अधिकृत सिर्जना थपलियाका अनुसार आसन्न स्थानीय तहको निर्वाचनका लागि ५ जनाले मेयर पदमा, २ जनाले उपमेयर पदमा, ४ वडाध्यक्ष तथा  २ जनाले वडा सदस्य पदमा उम्मेदवारी दर्ता गराएका छन् । 

निर्वाचन अधिकृत सिर्जना थपलियाले थानकोट टाइम्सलाई दिएको जानकारी अनुसार मेयर पदमा उम्मदेवारी दर्ता गर्नेमा तीन राजनीतिक दल छन् भने दुई जनाले स्वतन्त्र उम्मेदवारी दिएका छन् ।

त्यस्तै  उपमेयरमा एक राजनीतिक दल तथा एक स्वतन्त्र उम्मेदवारी परेको छ । वडाध्यक्ष पदमा चन्द्रागिरि ५ मा दुई जनाले स्वतन्त्र उम्मेदवारी दिएका छन् भने चन्द्रागिरि १ तथा ९ मा समान एक-एक जनाले वडाध्यक्षमा स्वतन्त्र उम्मेदवारी दर्ता गराएका छन् ।

वडासदस्य पदमा चन्द्रागिरि ५ मा दुईजनाले स्वतन्त्र उम्मेदवारी दर्ता गराएको निर्वाचन अधिकृतकको कार्यालयले जानकारी दियो ।

📢  थानकोट टाइम्समा प्रकाशित कुनै सामग्री पुनः प्रेषित गर्दा अनिवार्य रूपमा श्रोत खुलाउन पर्नेछ । साथै, थानकोट टाइम्समा प्रकाशित कुनै सामग्रीबारे गुनासो एवं जानकारी भए [email protected] मा इमेल गर्न हुन अनुरोध गर्दछौ ।