थानकोट, बैशाख १ ।

नेपाल प्रज्ञा-प्रतिष्ठानले पुस्तक प्रदर्शनी सुरु गरेको छ । बिहीबार प्रतिष्ठानका कुलपति गङ्गाप्रसाद उप्रेतीले प्रज्ञा भवनको भानुभक्त कक्षमा आयोजित पुस्तक प्रदर्शनीको आरम्भ गरे । सो अवसरमा कुलपति उप्रेतीले पठन संस्कृतिको विकास गर्न र नयाँ वर्षमा पाठकहरूलाई नयाँ पुस्तक पढाउने उद्देश्यले प्रदर्शनीको आयोजना गरिएको बताएको रातोपाटीमा खबर छ । उप्रेतीले भने, “प्रदर्शनीमा प्रज्ञा-प्रतिष्ठानद्वारा प्रकाशित नयाँ तथा पुराना सम्पूर्ण पुस्तक तथा पत्रिका एकै ठाउँमा उपलब्ध हुनेछन् । यसैले पनि प्रज्ञाको पुस्तक प्रदर्शनी विशेष छ ।”

दुई सातासम्म चल्ने पुस्तक प्रदर्शनीमा प्रज्ञा-प्रतिष्ठानका नयाँ तथा पुराना सम्पूर्ण प्रकाशनका अतिरिक्त साझा प्रकाशनद्वारा प्रकाशित पुस्तकसमेत उपलब्ध हुनेछन् ।

आयोजकका अनुसार सार्वजनिक बिदाका दिनमा समेत पुस्तक प्रदर्शनी सञ्चालन हुनेछ ।