थानकोट ।

मर्यादित व्यवसाय र प्रविधिमा सहकारी नाराका साथ ६५ औं राष्ट्रिय सहकारी दिवस आइतबार मुलुकभर मनाइएको छ । सो अवसरमा सहकारी संघसंस्थाहरूले विभिन्न प्रचारात्मक र प्रवर्द्धनात्मक कार्यक्रम आयोजना गरेका छन् । चन्द्रगिरि नगरपालिकामा नगर सहकारी समन्वय समितिको आयोजनामा नगर क्षेत्रभित्र क्रियाशील सहकारीहरूले संयुक्त रूपमा अन्तरक्रिया कार्यक्रम गरि यो दिवस मनाएका छन् । सहकारीहरूले आ-आफ्नो कार्यालयबाट चन्द्रागिरि नगरपालिका १२ बलम्बुसम्म बाजागाजा सहित प्रभातफेरि आयोजना गरेका थिए । प्रभातफेरि पश्चात गुर्जुधारामा आयोजित अन्तरक्रियामा विभिन्न वक्ताहरूले मन्तव्य राखेका थिए ।

वि.संं २०१३ चैत २० गते चितवनको शारदानगरमा ‘बखान ऋण समिति’बाट नेपालमा सहकारी अभियान शुरू भएको मानिन्छ । यसै अवसरको स्मरण गर्दै हरेक वर्ष चैत्र २० गतेका दिन राष्ट्रिय सहकारी दिवस मनाइने गरिएको छ ।